Saan a timmungpal iti tulagan ti suspek iti panagtakawan iti maysa a gasolinaan idiay Barangay Mambug, Burgos, Ilocos Sur iti nangiduron kadagiti akinkukua a nangidarum kenkuana gapu iti panangalana iti gatad a P1.6 million.
Ti suspek ket agtawen iti uppat a pulo ket uppat, naasawaan, kahera iti Ponsoy Refueling Station nga agnaed idiay Barangay Luna, Burgos.
Dagiti biktima ket agasawa nga agpada a senior citizen ng agnaed idiay Barangay Mambug, Burgos.
Iti pannaki-uman ti Bombo Radyo Vigan ken ni PCapt. Allan Reoliquio a hepe iti Burgos Municipal Police Station, idi December 10, 2024 ket naduktalan ti manugang dagiti agasawa ti aramid ti suspek ngem gapu ta asideg a kabagyanda ket nagsasaritada laengen iti barangay tapno masolbar iti parikot ngem saan a nagtungpal iti tulagan ti suspek isu a napilitanen dagiti agasawa a nagipila iti kaso.
Segun ken ni Reoliquio, naduktalan a 2016 pay laeng a nangrugi iti saan a husto nga isursurat a reading iti gasoline station ti suspek ngem saan a nadnadlaw dagiti akin-kukua gapu iti napalaus a panagtalekda kenkuana.
Arigna intalekda aminen ta saan laeng a nagbalin a kahera nudiketdi kasla manager iti panangibilangda kenkuana ngem iti saan a namnamaen a pagteng, iti panagbisita ti manugang dagiti agasawa ket naduktalanna nga agduma iti reading ti gasoline station ken iti pumping station-da.
Ngem iti baet nga inikkanda iti maikadua a gundaway tapno agbayad kadagiti innalana ket saan metten a nagparparang ti suspek kadakuada isu nga impiladan ti kaso a qualified theft.
Maipalagip a nasurok iti P1.6 million iti mapatta-patta nga innala ti suspek a sapul iti nasao a gasolinaan ta uray iti passbook dagiti agasawa ket intaltalekda kenkuana ngem ti saanda a namnamaen ket awan gayamen iti mapaspastrekda.
Balakad ni Reoliquio kadagiti addaan ti negosyo nga awan ti parikot nga agtalek iti sabali a tao ngem nasaysayaat a monitoren latta dagiti maipapaaramid kadakuada tapno masigurado a saanda a gundawayan ti talek a maipapaay kadakuada.
