VIGAN CITY – Balligi ti pannakadadael ti aggatad iti kagudwa billion a pisos a gatad dagiti iligal a droga a nasarakan dagiti mangngalap iti kallabes iti kabaybayan babaen iti pannakaidalanna iti incineration idiay Angels Crematorium, Don Lorenzo Querubin, Caoayan, Ilocos Sur.
Ti seremonya ket inimatangan da Governor Jerry Singson, Philippine Drug Enforcement Agency, Regional ken Provincial Police Officers, mayor dagiti ili a nakasarakan kadagiti shabu ken dagiti dadduma pay nga ahensia.
Iti panagsarita ni Joel Plaza, Director III ti Philippine Drug Enforcement Agency Regional Office 1, ti pannakadadael dagiti iligal a droga ket tapno maipasigurado iti publiko a dagitoy ket saanen a ma-recycle wenno mausar.
Malaksid dayta, ti nasao nga addang ket kas panangsurot iti kustodia ken disposisyon kadagitoy nga iligal a droga kas sagudayen iti Section 1 ti Article 9165 wenno Comprehensive Dangerous Drugs Act of 2002.
Impasigurado pay ti opisial nga agtultuloy ti panagridamda ken panangimbestigarda no siasino dagiti adda iti likudan ti kaadda ti droga iti kabaybayan.
