Pagtigtignayen ti gobierno ti kadakkelan a puersa iti 10,000 a TUPAD workers tapno isayangkat ti Expanded Bayanihan iti Estero Program manipod July 1, 2026.
Gagem a makissayan ti panaglayos kadagiti komunidad ken kangrunaan a kalasada idiay Metro Manila.
Segun ken ni Executive Secretary Ralph Recto, ti napainget nga operasyon ket kasaruno ti bilin ni Pres. Ferdinand Marcos Jr. a papigsaen dagiti addang tapno masalakniban dagiti komunidad a masansan a maapektaran ti napipigsa a tudo ken layos.
Iti panangidaulo ti Metropolitan Manila Development Authority (MMDA) kadua ti Department of Labor and Employment (DOLE), dagiti benepisyaryo ti Tulong Panghanapbuhay sa Ating Disadvantage/Displaced Workers (TUPAD) ti mangisayangkat iti panagdalus, panangikkat ti pitak ken basura, ken regular a panangmentenar kadagiti kangrunaan nga estero ken kanal idiay Metro Manila manipod ita a bulan.
