Mangnamnama ti kabagyan ditoy Ilocos Sur ti pulis a babai ken ti anakna a nasarakan a naisako ti bangkayda a mabigbig aminen no asino ti adda iti likudan ti nakaam-ames a pannakatayda.
Immuna a nasarakan ti bangkay ti biktima a pulis idiay Pulilan, Bulacan idi Enero 24, 2026 nga adda tama ti paltog ti ulona idinto a ti bangkay met ti anakna a ni John Ysmael nga agtawen iti walo ket nasarakan idiay Victoria, Tarlac.
Iti pannaki-uman ti Bombo Radyo Vigan ken ni Chelito Agbisit, uliteg ti biktima, limmag-an ti riknada ita nga adda iggem dagiti otoridad a posible a nangaramid iti nasao a krimen kadagiti agina ket mangnamnamada nga adda ti madusa.
Immunan a pinasingkedan ni Agbisit a napan dagiti agina idiay Novaliches tapno ilako ti luganda isu nga iti damo ket impagarupda laeng nga adda napananda.
Ngem nangrugidan nga agdanag idi saandan a makontak ken agingga a nasarakan ti bangkay dagiti agina.
Iti agdama, mangnamnamada a maipaay ti dagus a hustisia iti pannakatayda.
