VIGAN CITY – Patien ti Gabriela Partylist a ti awan a COVID19 mass testing ti pagilian ket wagas ti gobierno a mangilimed nga adu ti pagkuranganda kas kinuna ni Rep. Arlene Brosas iti pannaki-uman kenkuna ti Bombo Radyo Vigan.
Segun kenni Brosas, rumbeng nga aramaten ti gobierno ti amin a pondoda para iti mass testing ti pagilian ta no kabaelan ti Marikina LGU ket natalek a kabaelan met ti gobierno ti nasao a wagas agsipud ta responsibilidadda a masalakniban iti tunggal umili.
Inlawlawag ni Brosas a saan a naanay ti panangipatungpal ti gobierno ti community quarantine nga awan met ti naisayangkat a mass testing ta agingga tatta ket ngumatngato met latta dagiti kaso iti COVID19.
Kabayatanna, ingunamgunam ti opisial nga iti pannakaipatungpal ti lockdown ket rumbeng koma a nakasagana dagiti kasapulan a maaramid ngem arigna napilit dagiti umili nga agtalinaed iti pagtaenganda nga awan met ti panagtignay ti gobierno.
