VIGAN CITY – Narba ti kaar-aramid a rangtay idiay San Pedro, Narvacan ta inpilit ti maysa a backhoe driver nga inpagna iti nasao a heavy equipment ta mapan kuma agiserrek ti steel pipe a mausar para iti nasao a rangtay.
Segun ken ni San Pedro Brgy. Captain Ernie Molina , adda dagiti signage nga impanna tapno malimitaran ti panagdaliasat dagiti lugan nangruna dagiti daddakkel ngem kinuna a pinalubosan ti maysa nga engineer a lumasat ti nasao a backhoe nga isu metten iti rason nu apay a narba ken nadadael.
Ti panagtataripnong ti kapitan, konsehal ken ti engineer para iti pannakatratar ti pasamak, napagtutulaganda nga ipasimpa ti engineer ti rangtay ket inkarina a ti uneg ti tallo nga aldaw ket maileppasen ti panangtarimaanda.
Ti nasao a rangtay ket pagpagnaan dagiti agnaed idiay Barangay San Pedro ken Nanguneg West, Narvacan, ken Barangay Nagsayaoan, Sta. Maria a mapan iti ili.
