Pinasingkedan ni Bombo International News Correspondent Mandylaine Ruben a Pilipino ti kaaduan a biktima iti napasamak a trahedya idiay Vancouver, Canada kabayatan ti maysa a Pinoy street festival wenno ti ‘Lapu Lapu Day 25 Block Party.
Iti pannaki-uman ti Bombo Radyo Vigan ken ni Ruben, agsipud ta daytoy ket maysa a Filipino gathering, Pilipino met ti kaaduan a nakipaset wenno adda iti mismo a lugar a nakapasamakan ti nakaam-ames nga insidente.
Ti suspek a lalaki nga agtawen iti tallopulo ket datin nga adda iti lookout bulletin ti Vancouver Police idiay Canada, adda parikut ti panagpampanunotna ken mapapati nga agar-aramat iti iligal a droga.
Inladawan ni Ruben a napaspas ti pasamak agsipud ta kalpasan laeng iti sumagmamano a minutos sipud idi pumanawda koman iti lugar ket bigla a dimteng ti suspek a nagmaneho iti SUV nangarado kadagiti tattao nga adda idiay.
Iti dayta a gundaway, adun a tao ti nakadasay ken mangngeganen ti ikkis ken sangit ti kaaduan.
Iti agdama, addan ti sangapulo a natay ken duapulo ti nadunor iti napasamak.
