Binabalaw ti maysa nga Associate Professor of Journalism iti University of the Philippines – Diliman ti saan a nainkalintegan a panangpabasul ni Leyte Representative Richard Gomez kadagiti media a nangawis kenkuana iti interview kas paset iti mabaybayadan a ‘media spin’.
Dayta ket kalpasan ti panangipablaak ni Gomez iti social media ti screenshot iti conversation-da kadagiti media a nangawis kenkuana iti interview tapno yebkas ti sentimientona mainaig kadagiti ghost flood control project iti pagilian.
Iti pannaki-uman ti Bombo Radyo Vigan ken ni Prof. Danilo Arao, awan ti media spin a napasamak ta simple a panangawis laeng a ma-interview ti inaramid dagiti media ken ni Gomez.
Patien ni Arao a gundaway pay koma ni Gomez a makapagsarita iti patas ken mabalinna latta koma a sinungbatan iti nasayaat ti awis kenkuana imbes a pinadakkelna ti isyu.
Nupay kasta, inallukoy ti professor ti kongresista nga ag-public apology ta ti inaramidna a panangipablaak kadagiti conversation-da kadagiti media practitioner a pakakitaan ti nagan ken numeroda ket maibilang a panaglabsing iti Data Privacy Act.
Singasingna pay a nasken a dumalan iti seminar ti kongresista tapno maawatanna no ania a pudno ti trabaho ti media.
