Pinasingkedan ti Philippine National Police (PNP) a panawenen tapno papigsaen ken paingeten ti joint coastal patrols iti PNP Maritime Group kadua ti Philippine Coast Guard ken Philippine Navy tapno maleppasen ti illegal drug trade iti kabaybayan.
Segun ken ni PNP Spokesperson PBGen. Jean Fajardo, saan nga umuna a gundaway a nakarekubre dagiti mangngalap iti adu a sako iti illegal a droga iti kabaybayan.
Kinuna ni Fajardo a limitado laeng iti panagpatrolya ti law enforcement agencies kadagiti municipal waters gapu iti pagkurangan ti manpower.
Naammoan nga umabot iti P9 billion ti gatad ti sako ti illegal a droga iti nakita a tumtumpaw iti dadduma a sakup iti pagilian kas idiay Masinloc, Zambales; Santa Cruz, Ilocos Sur ken dadduma pay a coastal areas idiay Pangasinan.
Patien dagiti otoridad a nagtaud ti shipment iti isu met la a source iti Chinese-run Golden Triangle syndicate ta isu met la ti packaging dagiti illegal a droga a naala iti kabaybayan a sakup iti Ilocos idi napan a tawen.
