VIGAN CITY – Pulitika iti itudtudo ni Alicia Parado a rason nu apay a napaltugan ti anak ken ti apo na, pakairamanan iti maysa pay a kadua da idiay Sitio Baybayating, Collago, Lagayan, Abra idi April 18.
Segun ken ni Parado, dagiti met laeng kakabagyan da ti suspek iti nasao a pammaltog nga isuda Jerry Tabas a maysa a barangay kagawad, Henry Tabas alyas Kondari; Juny Tabas alyas Abbak kenni Dominador Cardinas Jr., alyas Jun Jun a barangay chairman ti Collago, Lagayan, Abra.
Ti nasao a pammaltog, natay ti anak ni Parado a ni Jhudges Castañeda Parado nga agtawen iti dua pulo ket dua ken nadunor met ti apo na a ni Leomar Parado Santos nga agtawen iti sangapulo ket siyam kenni Moises Gomez Salingbay.
Maibasar iti imbestigasyon, agiinom dagiti biktima iti pagtaengan ni Albert Balucas idi immasideg dagiti suspek ket nagsisinnungbat da agingga a nakapungtot ni Henry ket minalo na iti bote ti beer iti ulo ni Salingbay ket nagtaray a nagpaarayat ni Santos ken ti ulited na a ni Parado agingga a napasamak iti pammaltog.
Kalikagum ni Parado kadagiti pulitiko iti lugar da a nu mabalin ket kitaen da a naimbag dagiti supporters da tapnu saan da nga agdangran kadagiti sabali a tao.
