VIGAN CITY – Nagirig ti maysa nga Isuzu Aluminum Van gapu iti bigla a panagpreno iti nagmaneho a nakaitamaan pay ti maysa a Partas Bus idi kalman iti national highway idiay Barangay Dan-ar, Santiago.
Ti pannaki-uman ti Bombo Radyo Vigan kenni P/Lt. Rodel Ragasa a hepe ti Santiago Municipal Police Station, agpapa-amianan a direksyon ti nagmaneho iti Aluminum Van a ni Demetrio Supnet, agtawen ti dua pulo ket uppat, baro nga agnaed idiay Barangay Capangdanan, Bantay ken ti nagmaneho ti Partas Bus a ni Jingle Yoro, agtawen ti tallo pulo ket dua, naasawaan nga agnaed idiay Barangay Poblacion West, Santo Tomas, Pangasinan idi nadanonda iti nasao a lugar idi nagbabawi a nag-overtake ni Supnet iti outer lane ngem nabigla ta adda iti motor a nagbaliw iti lane-na ket nairana a naipan iti outer lane isu a nagpreno a gappuanan iti pannaka-out of balance-na a rason iti nagpusiposan iti lugan ket naisagid iti akin- kannawan a paset iti Partas ken akin kannigid a paset iti van.
Gapu iti dayta ket nadundunor iti nagmaneho iti Van a naipan idiay Rural Health Unit- Santiago para iti pannakatamingna idinto nga awan met iti naan-ano kadagiti naglugan iti bus.
Nakatuding iti panagsarita dagiti nairaman iti aksidente maipapan iti nadadael a paset dagiti lugan.
Mainaig dayta, ingunam-gunam ni Ragasa a no slow-moving vehicles ket kasapulan nga agaramat iti outer lane tapno nawaya latta dagiti napaspas a lugan nangruna dagiti daddakkel a lugan iti inner lane ta adda iti provincial ordinance a ti outer lane laeng iti mabalin nga aramaten dagiti motorsiklo ken tricycle ngem no ag-over take ket mabalin latta nga aramaten iti inner lane ngem agsubli met laeng iti outer lane a kangrunaan a pagnaanda.
