Impasigurado ni PCOL Darnell Dulnuan, Provincial Director ti Ilocos Sur Police Provincial Office nga ad-adda pay ti panangimuntarda iti CCTV kadagiti border ken barangay road gapu iti napasamak a panagatakaw ti Salisi Gang idiay Baranga Las-ud, Tagudin, Ilocos Sur.
Iti pannaki-uman ti Bombo Radyo Vigan ken ni PCOL Dulnuan, ti addang ket tapno ad-adda pay a mabantayan dagiti sumsumrek iti probinsia nga adda madi a panggepna.
Innayon ni Dulnuan a kasapulan ti panagridam ken panangipakaammo a dagus kadagiti pannakabagi ti linteg no adda madlaw a naidumduma ti garawna.
Maipalagip a ti panagtakawan ket napasamak iti Tagudin Yellow Public Market a ti biktima ket ni Maggie Lomboy Leal, agtawen iti uppat a pulo ket uppat, meat vendor, taga-Barangay Las-ud, Tagudin.
Nakemmeg met suspek a ni Kevin Idica Vergara, agtawen iti tallopulo, tricycle driver, taga-Tondo, Manila idinto a nakalibas dagiti kaduana a naglugan iti gray Toyota Innova.
Aglaklako ti biktima iti karne idi napan inallilaw ti baba a suspek a nagin-gagatang iti karne nga isu met gundaway ti lalaki a suspek a nangala iti black shoulder bag a naglaon iti nasurok-kumurang PHP100,000 a naikabil iti sirok ti tugaw.
Nadlaw met ti kadua ti biktima nga aglaklako a naala ti bag isu a timmawagda nga insigida iti Tagudin Police Station, puon ti nakakemmegan ti maysa a suspek.
Adda pay naala manipud iti suspek nga iligal a droga nga agdagsen iti 0.2 grams, aggatad iti PHP1,360.
