Nakasaganan ti Ilocos Sur Police Provincial Office iti pannakaipakat ti COMELEC checkpoint ken gun ban para iti panangbantayda iti seguridad kasangwanan ti 2025 elections.
Iti pannaki-uman ti Bombo Radyo Vigan ken ni Police Provincial Director Police Colonel Darnell Dulnuan, sipud pay idi napan a tawen ket maar-aramiden ti taripnong kadagiti regional, provincial ken municipal level tapno mapagpapatangan no kasano ti wagas a panangipatungpalda.
Katinnulong ti kapulisan dagiti dadduma pay a kameng ti law enforcement unit iti panangipasigurado iti linak ken talna, kasta payen ti nadalus ken napudno nga eleksyon.
Ti kampanya ti kapulisan nga OPLAN KATOK ti maysa kadagiti wagas tapno masigurado ti naan-anay a pannakaipatungpal ti gun ban, ta kada barangay ket katokenda dagiti adda iti listaan ti Civil Security Group tapno kitaen no expired dagiti License to Own and Possess Firearms da.
Impaganetget ni Dulnuan a dagitoy a tignayda ket tapnon matungpal ti gagemda nga awan ti mapasamak a kinaranggas kabayatan ti election period.
