Nangisayangkat ti assessment ti Ilocos Sur Police Provincial Office ken ti Sta. Maria Police Station iti ili ili nga inapektaran ti alipugpog nga intunda ti Super Typhoon Nando.
Iti pannaki-uman ti Bombo Radyo Vigan ken ni Provincial Police Director Police Colonel Darnell Dulnuan, dagus a nagtignay ti kapulisan kadua dagiti maseknan nga ahensia kagiddan ti panagduprak ti napigsa a bagyo tapno maipaayan iti tulong dagiti agindeg.
Iti agdama, napalubosan metten dagiti naapektaran nga agindeg nga agsubli kadagiti pagtaenganda.
Kabayatanna, pinasingkedan met ni Eric Pineda, maysa nga agindeg a naapektaran iti alipugpog a dakkel ti pukawda kadagiti lakoda a suka ta adu pay dagiti natuktukkol a kayo ken ti pannakaitayab ti atep ti puestoda.
Kunana a damo a mapasaranda ti kastoy a didigra ta iti las ud ti nakurang lima a minutos ket dakkel ti napukaw kadakuada.
Pagyamanan met ni Shiela Sanidad, maysa met laeng nga agindeg nga awan ti nadangran kadakuada iti panagduprak ti ipo-ipo.
Segun ken ni Sanidad, manarimaan ti panagdalusda iti pagtaenganda idin ta nakangngegda ti napaot a panaggarruod.
