VIGAN CITY – Pinasingkedan ni Ilocos Sur Police Provincial Director Police Colonel Darnell Dulnuan a generally peaceful ti probinsia iti baet dagiti napaspasamak nga insidente iti pammaltog.
Segun ken ni Dulnuan, adu a rason no apay a napaspasamak ti pammaltog iti probinsia manipud bulan ti Enero agingga Marso ket maysa a rason ti iligal a droga.
Kadagiti naglabas a bulan, kunana a balligi met dagiti inwaywayatda nga anti-illegal drug operation, search warrants ken marijuana eradication.
Ti laeng impormasyon ti ibilang ti opisial nga agkurkurang isu a kidkiddawenna ti panangipakaammo ti publiko tapno naal-alisto ti pannakasulbar dagiti kaso.
Gapu kadagiti nagsasaruno a pammaltog, mangaramid ita ti kapulisan iti baro a plano para iti naing-inget a pannakabantay ti seguridad dagiti agindeg ngem impasiguradona a daytoy ket saanda a pakaapektaran wenno pagreklamoan.
Malaksid dayta, imbutaktak ti opisial a maysa kadagiti nagsasaruno a pammaltog ita a bulan ket adda pakainaiganna iti iligal a droga.
Maipalagip a nagsasaruno ti pammaltog a napasamak iti probinsia – umuna idiay Barangay Pong-ol, Vigan City sinaruno ti Barangay Cuantacla, Cabugao ken idiay Barangay Taleb, Bantay nga amin dagiti biktima ket natay.
