Pinasingkedan ti maysa nga Infectious Disease Expert nga awan pay ti kaso ti Influenza-like illness a naka-admit iti Ilocos Sur Provincial Hospital – Gabriela Silang.
Dayta ket iti baet nga agraraira ita ti nasao a sakit iti intero a pagilian.
Iti pannaki-uman ti Bombo Radyo Vigan ken ni Dr. Roland Zara, awan kadagiti naka-admit iti nasao nga ospital ti agsagsagaba iti nasao a sakit ta kaaduanna ket pneumonia laeng.
Inlawlawag ni Zara a prone iti influenza-like illness dagiti 0-5 years old ken dagiti senior citizen a daytoy ket gapu iti flu virus a mayakar babaen iti respiratory wenno droplets.
Umab-abot met iti dua nga aldaw ti incubation period ket tapno matakuatan no daytoy ket influenza-like illness, maidalan ti maysa a pasyente iti confirmatory wenno swab test.
