VIGAN CITY – Maisayangkat ti expanded limited face-to-face classes iti Ilocos Sur National High School inton April 11 kalpasan ti pannakaited iti pagadalan ti Safety Seal certification manipud iti Department of the Interior and Local Government ken pannakaidalanna iti series of evaluation.
Dagiti nasurok sangaribo laeng a residente iti Vigan nga agbasbasa iti ISNHS a pinalubosan ti nagannakda ti makipaset iti maiwayat a limited face-to-face classes.
Gapu dayta, iti March 30 ken March 31 ket maisayangkat ti simulation tapno makita no ania dagiti rumbeng a maaramid no marugianto ti face-to-face classes ken no ania dagiti masapulto pay a pasyaaten.
Tapno saan nga agdudupudop dagiti sumrek ket mausar ti akin-abagatan a gate para kadagiti sumrek a lugan ket ti likudan a gate ti pagruaranda idinto a dagiti magmagna nga estudiante wenno empleyado ket mausar ti sangwanan a gate iti amianan ken pagruaran met iti northwestern back gate.
Malaksid dayta, ti met sango a gate iti aminan ti pagserkan dagiti agad-adal a taga- Barangay Beddeng Daya, Bongtolan, Cabalangegan, Cabaroan Daya, Cabaroan Laud, Camanggaan, Capangpangan, Nagsangalan, Purok a Bassit, Purok a Dackel, Raois, Rugsuanan, San Jose, San Julian Norte ken San Julian Sur.
Ti akin-amianan a gate met ti likudan ti pagserkan dagiti agad-adal a taga-Barangay VIII, IX, Ayusan Norte, Ayusan Sur, Barraca, Bulala, Mindoro, Pantay Daya, Pantay Fatima, Pantay Laud, Paoa, Paratong, Pong-ol, Salindeg ken San Pedro.
