VIGAN CITY – Kiniddaw ni Engr. Arnel Fernandez, Sub Manager iti Ilocos Sur District Cooperative Incorporated – Vigan Area ti pannakaawat dagiti umili no adda dagiti kanito nga agkaraiddep ti suplay ti koriente.
Iti pannaki-uman ti Bombo Radyo Vigan ken ni Engr. Fernandez, adda latta dagiti lugar a mayun-una a maisubli ti suplay ti korienteda ken adda met latta dagiti maud-udi ta kunana a taoda laeng met nga adda pagpatinggaan ti kabaelanda ket saanda a mapaggi-giddan.
Ti panagiddep ti koriente nga awan ti naipak-pakaammo a power interruption ket gapu kadagiti saan a mapakpakadaan a pasamak kas kadagiti madungpar a poste ken pannakaisab-it dagiti waya.
Gapu dayta, kiddawna kadagiti konsyumer a tumulongda babaen ti panangitawagda nga insigida no adda dagiti natuptupakan a distribution line tapno nadardaras a maduktalan no ania ti parikutna ket maisubli a naal-alisto ti suplay ti koriente.
Malaksid dayta, inlawlawag pay ni Fernandez nga iti tunggal panagawan ti koriente no agtudo wenno agkimat ket gapu ta adda salsalwadanda a recloser kadagiti distribution line tapno saan nga agparikut ti main source ti power transformer.
