VIGAN CITY – Saan a pudno nga adda iti barko a simmanglad ditoy probinsiya a nagluganan dagiti gangannaet iti kangitingitan iti pangta ti novel coronavirus a pagam-amkan dagiti umili a kas pinasingkedan ti Bureau of Immigration – Ilocos Sur.
Agsipud iti dayta, awan iti kasapulan a pagamkan dagiti umili agsipud ta dagiti empleyado ken opisyal ti BI ditoy probinsiya iti makumikom a mangbantay wennu mangkita kadagiti sumanglad a barko ken dagiti flights nga umay ditoy probinsiya.
Mainaig dayta, ingunam-gunam ti BI a saan a patiyen iti publiko dagiti awan kaes-eskan na a banag tapnu saan da nga agbuteng wennu ag-panic.
Kabayatanna, pinasingkedan ni Cabugao Mayor Eddie Boy Cobangbang a maipasardeng pay laeng iti panagsanglad dagiti barko nangruna ti nakaiskedyul inton Pebrero 26 idiay Salomague Port gapu iti pangta ti novel coronavirus.
Dayta ket agsipud ta kalikagum ti local a gobiyerno a maliklikan iti isasangpet wennu isasangbay dagiti barko a nagluganan dagiti gangannaet ditoy probinsiya a posible a carrier ti virus.
Nu bilang adda iti mailaw-an a sumanglad iti nasao a port, masapul nga adda iti grupo nga ipatulod ti Department of Health wennu alikamen a mangmonitor kadagiti gangannaet a dumsaag kadagiti barko tapno masigurado a saanda nga apektado iti nasao a sakit ken maikkat ti panagbuteng dagiti agindeg ditoy probinsia.
Ingunamgunam ti mayor a no man pay awan ti kaso ti coronavirus ditoy probinsia ket nasaysayaaten nga adda iti wagas nga aramidenda tapno malapdan ti panagwaras ti nasao a sakit ken masalakniban iti tunggal umili.
