
Impaganetget ni Pres. Ferdinand R. Marcos, Jr. a saan a rumbeng a palubosan iti pagilian ti iresponsable a panagminas.
Iti panaglukat ti Mining Philippines 2025 International Conference and Exhibition idiay Taguig, kinuna ti presidente a ti panagminas ket rumbeng a makatulong kadagiti umili babaen ti panagpatakder kadagiti pagadalan, ospital ken kalsada ket saan a makadadael iti komunidad ken aglawlaw.
Segun ken ni Marcos, nainget nga ipatungpal iti gobierno dagiti linteg kontra iti iresponsable a panagminas a makadadael iti kabakiran ken kadagiti karayan.
Kinunana a rumbeng a sumurot iti tunggal operasyon dagiti environment commitment iti pagilian a kas iti nakalanad iti Paris Agreement ken Philippine Energy Plan.
Pinasingkedan pay ti presidente dagiti reporma ti administrasion pakairamanan ti Enhanced Fiscal Regime for Large-Scale Metallic Mining Act para iti patas a buwis iti industriya ken ti Philippine Ecosystem and Natural Capital Accounting System Act tapno maaywanan iti natural resources iti pagilian.