VIGAN CITY – Inruar ni Santa Mayor Jesus “Popoy” Bueno ti Executive Order No.93 a mangpalubos a sumrek dagiti mangngalap ken komersiante manipod kadagiti kabangibangda nga ili ken siudad a para ti panawen ti panagi-ipon wenno Ipon Season bayat ti ECQ.
Iti pannaki-uman ti Bombo Radyo Vigan kenni Mayor Bueno, istrikto a tungpalen dagiti mangngalap ken komersiente nga aggapo ti sabali nga ili ken siudad ti pagannurutanda kas iti dokumento a medical certificate ken negatibo a resulta ti RT-PCR Test a naala iti uneg ti pito pulo ket dua nga oras sakbay a sumrek wenno Antigen Test a naala iti uneg ti dua pulo ket uppat nga oras.
Nayunay-unay ti panangsurot kadagiti minimum health standard kas ti social distancing, panagsuot ti face mask, panagsabon ken alcohol ti ima ken dagiti sumrek ti ili ket masapul nga agtalinaed laeng ti Santa Fish Landing Community.
Innayon ti Mayor a dagiti aglabsing ket madusa ken agmuelta kas nakaipauneg ti RA 11332 wenno Mandatory Reporting of Notifiable Diseases and Health Events of Public Health Concern Act.
