VIGAN CITY – Mamati ni dati a Magdalo Partylist Rep. Gary Alejano nga awan iti parikot iti panangawat ni Vice President Leni Robredo iti indiaya kenkuana ni Presidente Rodrigo Duterte nga agbalin a drug czar agsipud ta isun iti gundaway ni Robredo a mangipakita iti sabali pay a wagas a panangparmek iti iligal a droga ditoy pagilian.
Ti pannaki-uman ti Bombo Radyo Vigan ken ni Alejano, insingasing na a masapul nga adda ti inventory tapnu maamuan nu anya dagiti agkurang iti kampanya kontra iligal a droga iti agdama nga administrasyon ken nu anya dagiti addang a naiwayat a mabalin a mabaliwan wennu manayunan tapnu agballigi iti nasao a kampanya.
Innayon na pay nga uray nu dakkel a posibilidad a palab-og laeng iti panagbalin a drug czar ti bise presidente ket napintas latta a gundaway iti naited kenkuana tapnu mailinteg na dagiti ammo na a madi nga aramid iti agdama nga administrasyon.
Malaksid iti dayta, ingunam-gunam ti dati a kongresista a masapul a nalawag dagiti plano nga idatag iti bise presidente iti panagbalin na a drug czar tapnu isu iti kitaen dagiti tattao ken pangbabalawan da kenkuana nu saan na a maaramid.
