VIGAN CITY – Nainget iti bilin ti Provincial Health Office iti publiko a nu aggurigor dagiti ubbing ket masapul a maipan da nga insigida iti rural health unit, clinic wennu ti ospital tapnu maited kadakuada iti maiyannatup nga agas da.
Dayta ket gapu ti panagraira iti sakit a dengue a ti gurigor iti maysa kadagiti kangrunaan a pagilasinan na.
Inbaga ni PHO- Ilocos Sur head Dr. Carmeliza Singson a nu mabalbalin ket liklikan dagiti tattao ti agself-medication nu aggurigor, nangruna nu nabayagen iti gurigor tapnu saan nga isu iti pakatayan.
Sumagmamano ngamin kadagiti natay a biktima ti dengue ditoy probinsiya ket naduktalan a nagself- medicate da ken naladawen a naipan da iti ospital.
Inulit iti doktor a suruten iti publiko ti 4S campaign ti Department of Health kontra dengue tapnu maliklikan iti iyaadu ti dengue cases ditoy probinsiya.
Ti maudi a rekord nga iggem da, nasurok a sangaribo uppat a gasut ket sangapulo iti bilang dagiti nadengue ditoy probinsiya ket uppat iti natayen.
