Binilin ni Presidente Ferdinand Marcos Jr dagiti ahensia ti gobierno nga imbestigaran dagiti krimen a nakairamanan dagiti estudiante ken mangisursuro idi kallabes.
Segun ken ni Palace Press Officer Claire Castro, tignayan nga insigida ti gobierno dagitoy a pasamak nangruna ta dagiti menor de edad ti karaman.
Binilin ti presidente ti Department of Education, Department of the Interior and Local Government ken Philippine National Police tapno mangisayangkat iti imbestigasyon.
Tumulong pay ti Department of Social Welfare and Development a mangipasigurado ken mangbantay no maipatpatungpal met laeng a nasayaat ti child protection policy ti DepEd iti kada pagadalan.
Maipalagip a maysa a Grade 10 student ti pinaltugan ti 18-years-old a dati a nobiona iti uneg ti klasrumda idiay Nueva Ecija.
Malaksid dayta, maysa pay a mangisursuro ti pinatay ti estudiantena idiay Lanao del Sur gapu ti incomplete grade nga intedna.
