Nakumpiskar iti innem a palyado a pagkiloan iti Mantanas ken Dili Fish Market idiay Sta. Cruz.
Iti pannaki-uman iti Bombo Radyo Vigan ken ni PEMS Israel Albay a MESPO iti Sta Cruz Municipal Police Station, nakaawatda iti pakaammo manipod iti Market Manager a ni Joel Lopez kalpasan nga adda nagreport kadakuada nga adda palyado a pagkiloan dagiti nasao a tiendaan isu a kiniddawna iti tulong iti kapulisan para iti inspeksyon.
Segun ken ni Albay, dagiti nasao a pagkiloan ket napaneknekan a depektibo ken daanen isu a saan a husto iti kilo dagiti mailaklako.
Kinunana nga adda pay mismo a kameng iti PNP iti nabiktima dagiti aglaklako isu a naiwayat iti inspeksyon a gappuanan ti pannakakumpiskar dagiti pagkiloan ken pannakamuelta dagiti akin-kukua iti pagkiloan.
Impaganetget ni Albay kadagiti agtagilako iti tiendaan a saan a rumbeng a dadaelen iti talek iti publiko iti ilida ta adu dagiti agturturong iti lugarda tapno laeng makitienda gapu iti presko a lakoda ngem amangan nu mapukaw gapu iti madi nga ububraenda.
