VIGAN CITY – Napilaanen ti kaso a panaglabsing ti Presidential Decree 1602 dagiti innem a nakemmeg gapu ti panagsusugalda iti maysa a natayan iti alas onse bainte iti rabii idi April 17, 2024 idiay Barangay Nagsuputan, San Juan, Ilocos Sur.
Iti pannaki-uman ti Bombo Radyo Vigan ken ni PMaj. Benjamin Raquedan manipod San Juan Municipal Police Station, nagrespondeda iti report nga adda maisaysayangkat a panagsusugal iti nasao a lugar ket naaktoanda ti panagay-ayam ti pepito dagiti suspek.
Segun ken ni Raquedan, dagiti laeng nakasango iti lamisaan ti nakemmeg ta dagiti dadduma a kakaduada ket nakalibas.
Dagiti nakemmeg ket isuda Solly Singson Visario, agtawen iti uppat a pulo ket maysa; Julan Ponce Austria, agtawen iti uppat a pulo, Romy Pacorsa Pablo, agtawen iti limapulo ket innem nga agpapada nga agnaed idiay Barangay Nagsuputan, San Juan; Richard Ragadi Erese, agtawen iti limapulo ket maysa; Junel Batayola Jimenez, agtawen iti tallopulo ket dua; ken Richard Aquino Visario nga agpapada nga agnaed idiay Barangay Sarsaracat, Magsingal.
Naala kadakuada ti maysa a set ti baraha ken pusta nga aggatad P6,175.
Kabayatanna, kiddaw ni Raquedan kadagiti umili a makitinnulongda ket ipakaammo nu adda dagiti maar-aramid a maikaniwas kadagiti lugarda.
VIDEO – PMAJ. BENJAMIN RAQUEDAN
