VIGAN CITY – Innem ti nakemmeg a nagsusugal babaen ti naiwayat nga Anti-Illegal Gambling operation iti ili ti Santiago ken Sta. Lucia.
Idiay Barangay Salincub, Santiago a nakemmeg da Melecio De Leon Corpuz, agtawen iti innem a pulo ket innem; Rustom Gatmen Ellorin, agtawen iti duapulo ket lima; Reymart Anthony Arreola Garayan, agtawen iti duapulo ket uppat; ken ni Renante Barnachea Lodivico, agtawen iti limapulo ket tallo, agpapada nga agnaed iti Barangay Salincub.
Naaktuan dagiti suspek nga agaayam iti pusoy iti natayan ket naala kadakuada ti PHP1855 a pusta, baraha, lamisaan ken uppat a tugaw.
Dua met ti nakemmeg idiay Barangay Cabaritan, Sta. Lucia nga isuda Michael Maradin Habon, agtawen iti tallopulo ket pito ken ni Mark Angel Lamarca Acosta, agtawen iti sangapulo ket siam, agpada nga agnaed iti nasao a lugar.
Naaktuan dagiti suspek a nagaayam iti pusoy ken naala kadakuada ti maysa a set ti braha ken PHP5,079 a pusta.
Nupay kasta, sangwen dagiti suspek ti kaso a panaglabsing iti Presidential Decree 1602 wenno Anti-Illegal Gambling Act.
