VIGAN CITY – Innem iti nakemmeg iti agsina nga Anti-Illegal Gambling Operation a naisayangakat idi kalman September 15, 2021 iti ili ti Sta. Maria ken Vigan City, Ilocos Sur.
Dagiti nakemmeg idiay Sata. Maria ket da Ana Mae Torres, agtawen ti uppat a pulo ket dua, naasawaan, housekeeper nga agnaed idiay Brgy. Laslasong West, Cesar Peña, agtawen ti limapulo ket lima, naasawaan, mannalon, nga agnaed idiay Laslasong Norte ken Macrie Marim, agtawen ti innem a pulo ket maysa, naasawaan, housekeeper ken agnaed idiay Brgy. Maynganay Norte gapu iti panagsusugalda idiay Laslasong West, Sta. Maria.
Segun ken ni PLt. Joel Dasargo a hepe iti Sta. Maria Police Station, nabayagen nga adda nangipakammo kadakuada nga adda iti agsusugal iti nasao a lugar isu nga immuna a binagaanda ngem saanda a nangikaskaso isunga idi kalman ket naisayangkat ti operasyon.
Naaktuan dagiti suspek nga agaay-ayam iti tong-it’s a nakaalaan kadakuada iti limapulo ket dua a pidaso iti baraha, tallo a mono nlock a tugaw, maysa a kayo a lamisaan ken pusta nga aggatad iti pitogasut tallopulo ket dua a pisos.
Iti agdama ket addan dagiti suspek iti kustodiya dagiti pannakabagi ti linteg ket maisagsaganan ti kaso a sangwenda.
Malaksid iti dayta ket naisayangkat pay ti anti-illegal gambling operation idiay Sitio Nalasin, Brgy. Camangaan, Vigan City a nakakemmegan da Jocelyn De Peralta, agtawen ti duapulo, balasang, Daisy Arcejo, agtawen ti duapulo ket pito, balasang ken Aurora Quitasol, agtawen ti limapulo ket innem, naasawaan nga agnaed iti nasao a lugar.
Naaktuan a nagay-ayam iti tong-its dagiti suspek ket naala kadakuada iti maysa a plastic a lamisaan, tallo a monoblock a tugaw, maysa a set iti baraha ken pusta nga aggatad iti sangagasut pitopulo ket innem a pisos.
Iti agdama, addadan iti Vigan City Police Station tapno dumalan ti husto a proseso.
