VIGAN CITY – Nakemmeg iti innem a nagsusugal idiay Brgy. VI, Vigan City.
Segun ti Vigan City Police Station, dagiti nakemmeg ket nabigbig a da Honeylet Artates Castillo, agtawen iti tallopulo, naasawaan, STL employee; Jenny Artates Aporongao, agtawen iti tallopulo ket uppat, naasawaan, STL employee; Christian Lim Delostrino, agtawen iti tallopulo ket maysa, awanan trabaho; Erwin Tacud Battad, agtawen iti uppat a pulo ket dua, awanan trabaho; Danilo Agcamaran Quipotla, agtawen iti limapulo ket maysa, naasawaan, awanan trabaho nga agpapada nga agnaed idiay Brgy. VI, Vigan City; ken Benjamin Romano Baroso, agtawen iti innem a pulo ket dua, naasawaan nga agnaed idiay San Julian Norte, Vigan.
Insayangkat dagiti pannabagi ti linteg iti anti-illegal gambling operation iti nasao a barangay a gappuanan iti pannakakemmeg dagiti suspek a naaktoan iti panagay-ayamda iti pusoy.
Naala dagiti otoridad iti maysa a lamisaan, lima a plastic a tugaw, maysa a set iti baraha ken pusta nga aggatad iti P1,040.
Dagiti nakemmeg ket naipan iti Vigan City Health Office ngem adda itan iti kustodiya dagiti pannakabagi ti linteg tapno dumalan iti husto a proseso.
