VIGAN CITY – Innem a nagsusugal ti nakemmeg iti maysa a natayan idiay Brgy. Subec, Sta. Catalina, Ilocos Sur.
Iti pannaki-uman ti Bombo Radyo Vigan ken ni PSSG. Goevanie Rafanan nga imbestigador iti Sta. Catalina Municipal Police Station, nakaawatda ti report nga adda iti nagsusugal ti Lucky9 iti nasao a lugar isu a nagrespondeda ket naaktuanda dagiti suspek ti panagay-ayamda.
Dagiti suspek ket nabigbig a da Carlito Madriaga Jr, agtawen ti uppat a pulo ket dua, helper; Jericho Rara, agtawen ti duapulo, baro ken awanan ti trabaho nga agpada nga agnaed iti nasao a lugar; Renato Avila, agtawen ti uppat a pulo ket pito, naasawaan, karpentero nga agnaed idiay Brgy. Sinabaan, Sta. Catalina; Micheal Ricaña, agtawen ti duapulo ket lima, baro, awanan ti trabaho nga agnaed idiay Brgy. Lubong, San Vicente; Renato Rabena, agtawen ti tallopulo ket lima, baro, mannalon nga agnaed iti Brgy. Cabittaogan, Sta Catalina; ken Wilson Acena, agtawen ti tallopulo ket lima, naasawaan, tricycle driver nga agnaed idiay Brgy. Bayubay Norte, San Vicente.
Segun ken ni Rafanan, nalemmeng iti ayan dagiti nagsusugal ta adda da iti likodan ti maysa a telon isu a saan nga insigida a makita dagiti aglabas ngem adda iti katulonganda a nangipakammo kadakuada.
Naala kadagiti suspek ti pusta nga aggatad ti sangaribo pitogasut ket sangapulo a pisos ken tallopulo ket siam a piraso iti baraha.
Nupay kasta naipanen dagiti suspek iti Sta. Catalina Police Station tapno dumalan ti husto a proseso.
