VIGAN CITY – Innem a nagay-ayam iti pusoy dos iti nakemmeg idiay Barangay Napo, Magsingal, Ilocos Sur.
Segun ti Magsingal Municipal Police Station, dagiti nakemmeg ket da Constante Pagud Consolacion, agtawen ti limapulo ket lima, balo, awanan trabado; Roger Fuller Tamag, agtawen ti uppat a pulo ket pito, mannalon; Mary Ann Sabugo Salazar, agtawen ti tallopulo ket pito, naasawaan, awanan trabaho nga agpapada nga agnaed idiay Brgy. Napo, Sto. Domingo; Jovito Ubarre Tubon, agtawen ti limapulo ket uppat, mannalon; Sandy Paiste Tacazon, agtawen ti limapulo ket siam, mannalon nga agnaed idiay Barangay Napo, Magsingal; ken Carlito Silva Icasiano Jr., agtawen ti tallopulo, addaan ti live-in partner nga agnaed idiay Baracbac, Sinait.
Insayangkat dagiti pannakabagi ti linteg iti anti-illegal gambling operation iti nasao a barangay a gappuanan ti pannakakemmeg dagiti suspek a naaktoan nga agaay-ayam iti pusoy dos iti maysa a natayan.
Nalaa kadakuada ti pusta nga aggatad ti P19,051; maysa a set iti baraha; maysa a lamisaan; ken innem a tugaw.
Naipan dagiti suspek iti Magsingal District Hospital para iti physical examination ngem insigida met laeng a naiyakar iti Magsingal Police Station para iti proper documentation ken disposition.
