VIGAN CITY – Nakemmeg dagiti innem a nagsusugal iti naisayangkat nga Anti-Illegal Gambling Operation itattay alas tres ti malem idiay Brgy. Fuerte, Caoayan, Ilocos Sur.
Iti pannakipapatang ti Bombo Radyo Vigan ken ni PMaj. Henry Garcia iti Caoayan Municipal Police Station, insayangkatda iti operasyon iti kubo ti nasao a lugar a nakakemmegan dagiti suspek a da Roland Raciles Molina, agtawen ti duapulo ket walo, naasawaan; Reina Arquelada Vallejos, agtawen ti tallopulo ket maysa, naasawaan; Julie Ragudo Amanonce, agtawen ti uppat a pulo ket siam, naasawaan; Lorelyn Arquelada Abigania, agtawen ti tallopulo ket tallo; Regine Soberano Vallejos, agtawen ti sangapulo ket walo, balasang; ken Aileen Lazo Ragamat, agtawen ti tallopulo ket tallo, naasawaan, fish vendor nga agpapada nga agnaed idiay Brgy. Fuerte, Caoayan.
Segun ken ni Garcia, damo a makemmeg dagiti nasao a suspek iti nasao a panaglabsing iti Presidential Decree 1602 ta awan iti rekordda iti kallabes.
Naala manipod kadagiti suspek ti maysa a set ti baraha ken ti pusta nga aggatad ti sangagasut limapulo ket innem a pisos.
Nagpalagip ni Garcia kadagiti agindeg a liklikan dagiti illegal nga aramid ta nu adda iti linabsing a linteg ket sigurado a madusa isu a nasaysayaat nu sumurot kadagiti legal nga aktibidad.
