VIGAN CITY – Panaglabsing ti Presidential Decree 1602 wenno Anti Illegal Gambling Act ti sangwen dagiti tallo a nagsusugal idiay Calungboyan, Santa.
Nabigbig dagiti suspek a da Maricel Tianzon, agtawen iti uppat a pulo ken ni Kareen Bisenio, agtawen iti tallopulo ket siam kasta payen ni Jacqueline Billena, agtawen iti uppat a pulo ket dua nga agpapada a taga-Calungboyan.
Naaktuan dagiti suspek nga agtotong-its ket naala kadakuada ti maysa a set ti baraha, bisikleta, lamisaan, tugaw ken pusta a PHP530
Iggemen dagiti pannakabagi ti linteg dagiti suspek pakairamanan dagiti naala kadakuada nga ebidensya tapno dumalan iti husto a proseso.
Kabayatanna, tallo pay a nagsusugal ti nakemmeg iti naiwayat nga Anti-Gambling operation idiay Brgy Olo-olo Norte, Santiago
Nabigbig dagiti suspek a da Chona Bentor, agtawen iti limapulo ket dua, beautician; Lilybeth Sabalo, agtawen iti limapylo ket siam ken ni Mary Grace Bituang, agtawen iti tallopulo ket innem nga agpapada a taga-Olo-Olo Sur.
Naaktuan dagiti suspek nga agaayam iti tong-its ken naala kadakuada ti maysa a set ti baraha, lamisaan, tallo a tugaw ken PHP270 a pusta.
Gapu ti dayta, sumangoda iti kaso a panaglabsing iti Presidential Decree 1602 wenno Anti-Illegal Gambling Act.
