VIGAN CITY – Innem a lallaki ti nakemmeg gapu ti online sabong nga insayangkatda iti parking area iti Novo, Barangay 1, Vigan City ket sumangoda iti kaso a panaglabsing iti Presidential Decree 1602 wenno ti Anti-Illegal Gambling Act.
Dagiti suspek ket da Efren Virgo, agtawen iti limapulo ket uppat a taga- Brgy.IV; Joel Velasco, agtawen iti tallopulo ket maysa a taga- Brgy. San Julian Norte; Sherwin Fallaria, agtawen iti tallopulo ket uppat a taga- Brgy. Barraca; Ramil Aquino, agtawen iti limapulo a taga-Brgy. Pong-ol iti siudad ti Vigan; Reynaldo Quibote, agtawen ti uppat a pulo ket lima, a taga- Brgy. Callaguip, Caoayan nga agpapada a tricycle driver ken ni Gerald Parel, agtawen iti tallopulo ket uppat, promodiser a taga- Brgy. Pantay Daya;
Nakaawat iti report ti Vigan City Police Station inaig iti iligal a panagsusugal dagiti suspek iti Brgy 1, Vigan City isu a nagrespondeda ket naaktoanda nga agpipinnusta iti online sabong iti gatad a PHP1,180.
Naipan dagiti suspek iti Vigan City Health Office para iti pannakaidalanda iti medico legal exam ken nayakarda iti Vigan city Police Station karaman dagiti inaramatda a nagsugal tapno maidalan amin iti husto a proseso.
