VIGAN CITY – Innem manipud iti sangapulo ket tallo a barangay idiay Burdeos, Quezon ti napalawlawan ita iti layus gapu ti Typhoon Karding.
Iti pannaki-uman ti Bombo Radyo Vigan ken ni Kath Susan Torrano manipud iti MDRRMO, karaman dagiti bangka ti nayanud gapu ti layus ken nadadael dagiti dadduma a pagtaengan.
Ala una idi kalman idi marikna iti nasao a lugar ti napigsa nga angina ken tudo a nagpaot agingga iti alas nuebe iti rabii.
Pagat-siket ti layus kadagiti pagtaengan nga asideg iti karayan idinto nga iti pagat-tumeng met iti Poblacion areas.
Gapu dayta, adu a residente ti pimmanaw kadagiti pagtaenganda a napan nagkamang iti simbaan.
Malaksid dayta, maysa a rangtay manipud iti maysa a barangay ti saan pay a madalanan gapu ti pannakadadaelna nga ita ket manarimaan pay laeng ti maar-aramid a clearing operations.
Iti agdama, awan pay met dagiti naimaldit a natay wenno mapukpukaw gapu ti bagyo.