Dinamag ti maysa kongresista no valid dagiti kinasar ni dismissed Bamban Tarlac Mayor Alice Guo no mapaneknekan a saan a Pilipino ti dati a Mayor.
Segun kenni 4PS Party-list Representative JC Abalos iti plenary debates ti budget iti Kamara, nakailanad iti linteg a no awan ti authority a mang- solemnize ti maysa a solemnizing officer ket maibilang a void ti kasar, isu a dinamag na no kasanon dagiti Pilipino a kinasar ni dismissed Bamban Tarlac Mayor Alice Guo.
Iti agdama, adda nakapenpen a petition for quo warranto iti Office of the Solicitor General iti Manila RTC tapno maikkat iti bisa ti panangabakna kas Mayor ti Bamban Tarlac idi 2022, ken adda pay misrepresentation na iti COMELEC a ti pokus na ket dagiti pannakapaayna a matungpal dagiti qualifications idi nagkandidato a Mayor.
Iti baet dagiti sangsanguen a kaso ni Alice Guo, kinuna ni Congresswoman Stella Quimbo, sponsor ti budget ti PSA, iti agdama ket on the process ti panangkanselar ti birth certificate ti dati a Mayor, ket no bilang nga aprobaran ti korte, isarunoda dagiti record nga inkasar iti nasao Mayor no valid.
Kabayatanna, patien ni Department of the Interior and Local Government (DILG) Secretary Benhur Abalos a valid dagiti kasar nga inaramid ni dati a Mayor Guo no good faith wenno addaan iti nasayaat nga intension wenno pammati.
