VIGAN CITY – Umabot iti PHP587,460 ti pakpakauna a gatad dagiti nadadael iti sektor ti agrikultura idiay Batanes gapu ti bagyo Betty.
Iti pannaki-uman ti Bombo Radyo Vigan ken ni Governor Marilou Cayco, malaksid kadagiti mangngalap a saan a napalubosan dua a lawas sakbay bagyo a mapan iti taaw ket dagiti mannalon ti maysa pay kadagiti kakaroan a naapektaran gapu ta adu kadagiti mulada ti nagango gapu ti nadaras a panagbaliw ti paniempo.
Kabayatanna, inlawlawag met ti gobernador a saanda a kasapulanen ti agideklarar iti state of calamity ta saanda unay a nakaro a naapektaran.
Impasiguradona met a dagiti sangapulo ket uppat a pamilia a nagbakwit ket nakaawiden kadagiti pagtaenganda idinto nga agawat metten ti Batanes kadagiti turista.
Kabayatanna, dagiti nastranded a turista ket naipaay met amin a kasapulanda, segun iti gobernador.
