VIGAN CITY – Immapela ti Vigan City Government iti Sangguniang Bayan a mangipasada iti ordinansa aginnga inton sumaruno a lawas tapno maited ti suporta kadagiti hog raiser a naapektaran iti African Swine Fever iti siudad.
Impasigurado ni Mayor Juan Carlo Medina kadagiti hog raiser nga adda ti indemnification fund a maited kadakuada tapno adda ti sukat dagiti baboyda a naidalan iti culling operation ken kumkumpirmaranda no adda ti nakasagana nga ited pay ti Department of Agriculture a tulong kadakuada.
Nakikammayeten ti city government kadagiti barangay a maapektaran no kasano kadakkel ti radius a sakupen ti culling operation tapno saan nga agwaras ti virus kagiddan ti panagimbestigarda ti nagang-angkatan dagiti apektado a hog raiser iti baboy iti 1st district ditoy probinsia .
Nupay kasta, agtultuloy ti culling operation kadagiti baboy ken nainget ti panangbantayda tapno saanen a maapektaran dagiti baboy idiay Brgy. Raois ken Rugsuanan kalpasan a nagpositibo ti siam a blood sample dagiti baboy idiay Brgy. Pantay Fatima iti ASF.
