Idurduron ni Senate Senior Deputy Majority Leader JV Ejercito a mailaksid iti buwis dagiti mangmangged ken dagiti empleado a makapaspastrek iti agingga P50,000 iti kada bulan wenno P600,000 iti kada tawen.
Iti Senate Bill No. 2341 nga impila ni Ejercito, gagemna daytoy a pagbalinen a dakdakkel ti take-home pay ti minilion a mangmangged a Pilipino ti baet ti agtultuloy a panagpangina ti presio dagiti kangrunaan a magatang.
Iti salinong ti gakat, saan a mapatawan iti income tax dagiti indibidual a mangmangged a makapaspastrek iti P600,000 manipud iti agdama a P250,000 a sueldo kada tawen iti salinong ti Republic Act No. 10963 o Tax Reform for Acceleration and Inclusion (TRAIN) Law.
Segun ken ni Ejercito, saan laeng daytoy a maysa a tax reform measure no di ket para kadagiti middle-income earners nga agtrabtrabaho, agbaybayad iti buwis ken dakkel ti naitulongna iti ekonomia uray no nangina ti magatang.
