VIGAN CITY – Naisayangkat iti inagurasyon ti Barbar Small Reservior Irrigation Project ti National Irrigation Administration idiay Barangay Barbar, San Juan babaen iti presensya da NIA Administrator Gen. Ricardo Visaya, Gobernador Ryan Singson, Congressman Deogracias Victor Savellano, NIA RO1, Regional Director, Eng. Angelito Miguel, Mayor Elaine Sarmiento ti ili a San Juan ken Sangguniang Panlalawigan Member Efren Rafanan.
Ti nasao a proyekto ket dakkel ti tulongna kangrunaan kadagiti mannalon tapno mapasayaat pay iti talonda ket manayunan pay iti apitenda a produkto kas iti pagay, mais, tabako ken nanateng.
Umabot iti 845 nga ektarya a talon manipod sangapulo ket maysa a barangay iti ili ti San Juan iti maserbian ti nasao a proyekto pakairamananen ti barbar, Nagsabaran, Nagsupotan, Muraya, Immayos Sur, Guimod Sur, Camanggaan ken Bacsil.
Adda pay dagiti dadduma a barangay idiay Magsingal ti mabenepisyaranna pakairamananen ti Macatcatud, Caraisan ken Barbarit ngem iti kangrunaan a mabenepisyaran ket ti pito nga irrigator association, 1,156 a pamilia ken maysa a pederasyon iti San Juan ken Magsingal.
