Desidido nga agidarum ti ina ti ubing a dinangran ti kaadalanna idiay Quinarayan Elementary School, ili ti Narvacan, Ilocos Sur.
Iti pannaki-uman ti Bombo Radyo Vigan ken ni alyas “Raquel”, saanna a palabsen ti pannakadangran ti anakna nangruna ta saan la a namnaminsan a naaramid kenkuana daytoy.
Aminado nga adda met nagbasulan ti anakna gapu iti panagidulinna iti alikamen ti kaadalanna, ngem bassit laeng koma met daytoy a banag isu a saanna a maawat a balsenda ti anak iti naranggas a wagas.
Iti agdama, yur-urayda ti resulta ti pannakaidalan iti CT scan ti anakna kalpasan a daytoy ket nakabil ken nakugtaran.
Kabayatanna, aminado met ti nagannak ti ubing a nangdangran a nagbasul ti anakda ken saanda a kunsintiren daytoy nga inaramidna.
Iti pannaki-uman ti Bombo Radyo Vigan iti ina ti nangdangran nga ubing, kayatda a makapagpapatangda a nasayaat iti nagannak ti nadangran nga ubing tapno makapagkiddawda iti dispensar.
Namnamaenda a sapay ta agkikinnaawatanda ken masulbar met laeng daytoy iti kabiitan a panawen nangruna ta agpada nga agbasbasa pay laeng dagiti annakda.
