VIGAN CITY – Saan a ninamnama ni Matilde Bautista, ina ni Private First Class Ariz Bautista, agtawen iti duapulo ket innem a maysa kadagiti pimmusay a suldado idiay Malibcong, Abra gapu ti panangambush kadakuada dagiti kameng ti New People’s Army a mapasamak ti kastoy iti anakna.
Iti pannaki-uman ti Bombo Radyo Vigan ken ni Bautista manipud idiay Sitio Turod, Panay Sur, idi Martes ket nagawid iti pagtaenganda ti anakna ta immay nangala iti kayo nga usarenna koma para iti aramidenna nga indayon para iti dua a bulan a putotna sakbay a nagsubli idiay Malibcong idi Mierkoles.
Saanen a naituloy pay ti ina ti biktima ti panag-black rosary-da idi impadamag kenkuana ti abalayanna nga adda dagiti makipagladladingiten iti manugangna.
Innayon ni Bautista a lima tawenen ti buridek nga anakna a kas maysa a suldado ken adun dagiti nakaidesdestinoannan ket, kinunana nga ad-adda pay idi a maam-amakda idi naidestino idiay Mindanao.
Idi naudi a nagawid ket inyang-angaw pay laeng ti biktima idi inub-ubbana ti putotna a saanen nga agsubli idiay Malibcong ta aywananna laengen ti putotna ken kasta met nga inton umay a tawen ket isu koma pay ti naituding a panagkallaysada ti live-in partnerna.
Nupay kasta, mayawid nga umuna ti bangkay ti biktima idiay Bantay a lugar ti live-in partnerna sakbay a maipan idiay Panay Sur nga isu ti pakaimasayaganna agingga a maitabon.
