VIGAN CITY – Pabasolen ti ina ti balasitang nga agtawen ti 11 a taga- Boquig, Bantay ti social media, nangruna iti group chat a nakaikappengan ti anak na nu apay a nagbalin a sensitive wennu managpauyo nga isun iti poon iti nagbekkelan na idi naminsan nga aldaw.
Ti pannaki-uman ti Bombo Radyo Vigan ti ken ni Jean Rose nga ina ti biktima, sakbay iti pasamak ket agin-innangaw ti biktima ken ti kabsat na a lalaki agingga a nagkinnatil da ket binekkel ti biktima ti ading na ket dinanug met ti kabsat na ti manang na.
Nagkinnamat da agingga idiay kalsada ket nangala ti biktima iti bato nga indanug na ken ni ading na isu a nagsangsangit a napan nagkamang ken ni mamang da ket inpulong na iti inaramid ni manang na kenkuana.
Idi nakita met ni Jean Rose ti biktima ket insipat na iti luppo ti anak na iti iggem na a sagaysay ta pangtubngar na iti inaramid na ken ni ading na ngem kasla kinagura ti anak na isu a nagtaray ket simrek idiay balay da.
Malemen idi madlaw da a saan met laengen a bumababbaba ti biktima isu nga inbason ni Jean Rose ti maikadua nga anak na a mapan ta kitaen ni manang na ket idi nagsubli, naibaga ti ubing a delikado iti langa ti kabsat na isu nga immuli ni Jean Rose ket nakita nan ti anak na a nakabitin idiay tawa iti kwarto na babaen iti tali nga inputipot na iti tengnged na.
Naitaray idi malem ti Lunes iti kaasitgan nga ospital ti biktima ngem idi 4: 30 iti parbangon ti Martes ket pimmusayen.
Kayat nga ibingay ni Jean Rose iti napasamak ti anak na kadagiti pada na a nagannak tapnu kitaen da dagiti annak da nangruna ket sabali ti impluwensiya ti social media kadagiti sumagmamano a menor de edad kadagitoy a panawen.
