VIGAN CITY- Ti ina a mismo a ni Patricia Viloria, a taga Caburao, Santiago ti nangireport kadagiti otoridad ti anak na a ni Karen Viloria, agtawen ti 26 , balasang, gapu iti panagprobokar na ta mapapati nga adda iti impluwensya iti iligal a droga.
Iti panagresponde dagiti otoridad ket naanawan dagiti opisyal ti barangay ti suspek ngem idi kinapkapan dagiti pannakabagi ti linteg ket naala kenkuana ti maysa a sachet ti maatap a shabu ken aluminum foil nga addaan ti maatap a shabu residue.
Segun kenni PS/Insp. Aristeo Tajon, hepe ti Santiago Municipal Police Station (MPS), maibasar iti ina ti biktima ket naigameren iti iligal a droga ti anak na a no dadduma ket dumawat pay kenkuana ti igatang na ti shabu ngem gapu ta saan na a maanawa ket inreport nan kadagiti otoridad.
Ti agdama ket imimbestigaran dagiti otoridad no nagapwan ti suplay ti iligal a droga nga us-usaren ti biktima pakairamanan dagiti dati kinarelasyon ken gagayyem na.
