Nasarakanen ti bangkay ni Mary Ann Ramos Daria, agtawen iti uppat a pulo ket pito a taga-Barangay San Mariano, Bantay, Ilocos Sur a nayanud idi Biernes idiay Abra River.
Ti pannakasarak ti bangkay ti biktima ket kalpasan ti dua nga aldaw a panangsapsapul dagiti maseknan.
Nabigbig dagiti karaman iti pasamak a da Nolie Ayudan Daria, agtawen iti limapulo; Mary Ann Ramos Daria, agtawen iti uppat a pulo ket pito; Edward Ramos Daria, agpapada nga agnaed iti nasao a lugar.
Maipalagip a sangapamiliada a nayanud idi panawen a limmasatda iti nasao a karayan babaen iti linugananda a rakit tapno mapanda iyalikaka dagiti tarakenda a kalding ngem idi addadan iti tengnga ti karayan ket napattog ti rakitda.
Nakontrol ni Edward ti rakit ken naisalakanna ti amana a ni Noli ngem ti inana a ni Mary Ann ti saannan a naisalakan.
