Inwaragawag ti Senado ita nga aldaw a maisanud pay laeng ti pannakairugi ti impeachment trial ni Vice President Sara Duterte agingga a maurnoston ti House prosecution panel kas maisurot iti komposisyon nga intuding ti 20th Congress.
Segun ken ni Senate President Francis Chiz Escudero, nga isu ti mangidadaulo iti impeachment court, masapul a mabukel pay nga umuna ti grupo ti depensa ken prosekusyon.
Kasapulan a mabukel ti baro a prosecution panel ti kamara para iti 20th Congress gapu iti ipapanaw dagiti dadduma a kongresista kalpasan ti eleksyon ken panagakarda ti dadduma iti sabali a posisyon.
Nupay kasta, impasigurado ni Escudero iti publiko nga agtuloy ti panagsagsaganada para iti impeachment trial bayat a mangrugi ti 20th Congress.
Innayon ti Senate Presidente nga adda sumagmamano a napateg a patangan a masapul a mayurnos sakbay a marugian ti trial, agraman ti panangbukelda kadagiti pagannurotan iti impeachment, ken ti panangsulbar kadagiti saludsod mainaig iti reklamo a naipila kontra iti bise presidente.
