Posible a mangrugi ti impeachment trial ken ni Vice President Sara Duterte inton July 30, 2025 kas maibasar iti insingasing a kalendaryo ni Senate President Chiz Escudero.
Maibasar iti proposed schedule, agsubli ti session iti Senado inton June 2 a pakaipresentaran iti plenaryo ti articles of impeachment ken pakaaprubaran ti impeachment rules.
Inton June 3, agsapata dagiti senador a tumakder a senator judges.
Sumaruno iti pannaka-isyu ti summons ken panangawat ti pleadings.
Naituding met iti pre-trial inton June 24 agingga 25.
Inton July 29, maysa nga aldaw kalpasan ti State of the Nation Adress ni Pres. Ferdinand Marcos Jr. ket agsapata dagiti baro a napili a senador kas senator judges.
Inton July 30 iti mismo a panag-convene ti impeachment court ken isu ti panagrugi iti trial proper.
Nangiruaren ti special order ni Escudero a nakaipaunegan ti listaan dagiti responsibilidad iti Senate secretary ken dadduma pay a kangrunaan iti Senado.
