Pinasingkedan ni Senator Imee Marcos nga adda posibilidadna nga ituloy ti Kamara ti panangipila ti impeachment case kontra kenni Vice President Sara Duterte iti laksid ti panawagan ni President Marcos nga aksaya laeng ti oras ken saan a makabenipisyo iti biag dagiti Pilipino.
Segun kenni Sen. Marcos, impatangken dagiti kongresista a responsibilidadda iti mangidaulo ti tunggal impeachment complaints, nga iti kayat na a sawen ket nalawag nga ituloyda a denggen ti reklamo a mang-impeach iti bise presidente.
Mamati ti agpanpanday-linteg nga aprobaran iti Kamara ti impeachment case gapu ta aniaman a kayat ti liderato ket isu ti masurot.
Maipalagip nga adda ad-adalen dagiti dadduma a kongresista nga impeachment case kontra kenni Duterte gapu iti betrayal of public trust, bribery, ken dadduma pay a krimen kas ti plunder a target a maipila kalpasan iti agdama a tawen.
