Posible a maisayangkat ti impeachment process uray no naka-session break ti kongreso.
Dayta ti pinasingkedan ni Senate President Chiz Escudero ita nga adda laengen innem nga aldaw a nabatbati sakbay ti adjournment ti sesyon para iti Christmas break idinto nga adda met ti 24 session days iti sumaruno a tawen sakbay ti recess tapno ikkan gundaway ti 2025 midterm elections.
Segun ken ni Escudero, posible ti pannakaisayangkat ti impeachment proceedings uray naka-session break ta ti nasao a proseso ket saan laeng a maysa a sesyon a kasapulan a maigiddan met iti counterpartda iti kamara.
Ngem daytoy ket depende pay iti mapagdesisyonan ti impeachment court.
Iti dua a kaso ti impeachment complaint kontra ken ni Vice President Sara Duterte, gapu ta awan pay iti 1/3 ti nangiyendorso iti kamara ket dumalan pay iti proseso ti impeachment hearing iti kamara ket no nakitaan iti umanay a merito ken probable cause ket sa laeng mayuli iti impeachment court ti Senado.
Innayon ni Escudero a saan nga ababa daytoy a proseso sakbay a makasangpet iti Senado.
