Inlawlawag ni Impeachment Trial Presiding Officer Francis “Chiz” Escudero a saan nga obligado a dumar-ay a pisikal ni Vice President Sara Duterte iti trial ta imbagi isunan dagiti abogadona.
Segun ken ni Escudero, awan ti pagannurotan ti impeachment court a mangbilin iti respondent nga agtugaw kadagiti panagdenggeg no saanna a kayat ta adda dagiti abogadona a mangig-iggem iti depensana, ngem adda ken ni VP Sara no kayatna a sumango iti korte.
No kayat ti biang ti prosecution nga paayaban ni Duterte tapno agtestigo ket mabalinda a mangipila ti pormal a mosyon wenno kiddaw iti korte a pagdesisyonan pay dagiti senador.
Nagsarita ti Presiding Officer kasaruno ti saludsud ni counsel for the prosecutor Atty. Lorna Kapunan, iti maikadua nga aldaw ti impeachment trial, nu dumar-ay ti bise presidente kalpasan a nakita iti pasilidad iti Senado.
